E EU POR NON TER DIÑEIRO.....
CONTO
CONTO
Era unha tecelá moi boa moza que vivía nun rueiro na raia de dúas
parroquias e un día veu o padre cura da súa aldea e díxolle que era moi
guapa e porque non ía confesarse con el. Deulle un pouco de leria e
marchou.
Outro día veu o cura da outra parroquia e tamén lle deu leria, dicindo que había de volver.
A tecelá, cando chegou o home do traballo, contoulle o conto. El, ao
primeiro, encarraxouse pero rematou por rir. Díxolle que se podían facer
ricos e conviñeron que a muller convidara aos dous cregos para a
tardiña dun mesmo día, deixando un pouquiño de tempo entre a chegada de
un e mais a do outro.
Ao vir o día, xa por a tardiña, o crego da parroquia, temendo algunha mala xogada, díxolle ao sancristán:
-¡Oes, vaite ver se está o home da tecelá na casa, hom, que teño que falar con el!
O sancristán foi e maliciando algo, propúxolle á tecelá se el tamén
podía pasar pola súa casa e ela púxolle hora, un pouquecho máis tarde
para lle dar tempo a saír ao abade.
Decontado picou na súa porta o crego da parroquia.
Cando o señor abade se poñía na mesa que había de par na cociña,
petaron á porta e a muller, acenando cun dedo diante da boca para que
non armase barullo, levouno ao forno , abriulle a porta, e o outro como
puido meteuse dentro.
Daquela entrou o outro crego.
-¿E ti que facías, muller, que non me mandaches entrar de contado?
-Estába cun laboriño, señor.
E cando falaban chamaron de novo.
-¿Que faremos? -dixo o señor abade gañado do medo.
-¡Veña aquí axiña! -fixo a tecelá.
E agachouno dentro da artesa.
O sancristán meteuse para dentro coma un raposo na capoeira e, cando o
home estaba todo fachendoso, sentiu vir pola eira, botando unha cantiga,
ao home da tecelá, e xa non tivo modo de fuxir e daquela, como can
vello que era naqueles asuntos, agachouse o mellor que puido cabo do
tear.
-Canta fame traio, rapaza -dixo o home ao entrar.
E coa mesma foi levantar a tapa da artesa.
-¡Éche bo o pan que me gardas, así Deus me salve!
E dirixíndose ao señor abade engandiu:
-¿E vostede que é o que fai aí, señor? ¡Saia para fóra que vai afogar!
O crego, tremendo coma un vimbio, botouse fóra da artesa chéiño de medo.
-¡Eu que procuraba pan -dixo o home .e atopou un abade! Mirarei logo no forno, que aínda haberá da fornada.
A muller desaparecera pechando por fóra a porta da cociña e o tecelán
abriu o forno. O crego da parroquia, que non podia máis, brincou fóra
como puido.
-¡Uf! -facía-. ¡Eu ahogo!
E botaba espuma pola boca e suaba a fío.
-¡Isto ponse bo! -falou o tecelán.
E sacou ao sancristán da súa agachada, dicíndolle:
-¡Tamén ti, hom!
Falaron, e os outros viñerónse ás boas, chegando a un trato, e saíu o
sancristán e volveu logo con dúas bolsas de onzas, unha de cadanseu
cura. Deullas e non querían contalas porque dicían que non había luz e,
daquela, o home fixo ir ao mesmo sancristán á misa pillar unha vela e,
como el non tiña saquetos de onzas para dar, fíxolle servir de
candeeiro.
Cando chegou o día da festa do patrón da parroquia, había moita familia
para a misa. A función era moi soada, non collendo máis xente na
igrexa, e viñera para axudar a catar a misa o señor abade da parroquia
veciña o que, cando viu diante de todos os fregueses á boa moza da
tecelá tan ben posta que daba xenio vela, cantoulle ao compañeiro:
-¡Mira a moza, que guapiña!
e o outro crego respondéulle:
-¡Á túa conta e mais á miña!
E daquela o sancristán, engadiu facéndolles o son:
-¡E a min, por non ter diñeiro.
XOAN ARCO DA VELLA
SÍGUENOS:
Facebook
Twitter
Pinterest
Google+
Instagram
YouTube
No hay comentarios:
Publicar un comentario
Está permitida la reproducción total o parcial de los trabajos y fotos de este blog.
Te agradecemos nos sugieras de sitios para trabajos nuevos.
Mis correos:
Apd. de Correos: 83 - 36900 - Marin - Pontevedra
xoanarcodavella@gmail.com
Telf - WhatsAp.: 600590901